Occo Mahabad Çavmorikê

Çavmorîkê…

Çavmorîkê
Veqetînek bû evîn
Çavên girî
Esmanên bêdawî
Rêyên dûr bûn
Dizanim
Dawiyê
Her rê digihîşt destên te yên biçûk
Her hesret di hembêza te de bi dawî dibû
Tu digiriya
Min hêstirên çavên te vedixwarin
Te nifir dikirin
Ez dikeniyam
Helbest:Occo Mahabad

Occo Mahabad Reşikê

Reşikê…
Çima îşev destên te
Xayin xayin hez dikin
Çima tu xayin xayin dikenî
Çima kulîlkên te
Xayin xayin bêhn didin
Reşê Reşikê
Porreşikê
Rûreşikê
Çavreşikê
Mijangreşikê
Ka bêje
Kî berxikên çavên te
Bazar bi bazar firotiye
Kî helbestên rêkirî
Şev bi şev kuştiye
Kî klamên hembêzkirî
Kêlik bi kêlik girandiye..

Reşê Reşikê
Tu reşik î
Xayintî ne li gorî te ye
Ka bêje
Kê tu êşandiyî bi dilê xwe
Kê tu xapandiyî bi peyvên xwe
Kê bi gunehên xwe
Gunehên te şuştine…

Oyy oyy Reşikê
Ma tu nabînî
Min hembêza xwe vekiriye
ji bo hêstirên çavên te
Ma tu hîs nakî
Dikarim
Her tiştên xwe bidim te
Dikarim
Wekî mirinekê te hez bikim
Reşê Reşikê
Dilreşikê
Rondikreşikê
Kenreşikê
De bêje
Çima tu wiha perîşan î
Bi perîşaniya xwe
Min jî dikî perîşan…
Helbest:Occo MAHABAD

Occo Mahabad-Rondikên Binevşê

Helbest:Occo Mahabad

Rondikên Binevşê

Rondikên Binevşê
Tenêtî ye
li benda dilekî
di nava odeyekê de ..
Rondikên Binevşê
Hesret in
Li benda destekî
Di nava şerê evîna xwe de..
Rondikên Binevşê
Êş in
nifir in
sebir in
Di nava bêkesiya min de
Di nava tenêtiya xwe de..
Rondikên Binevşê xewnek e
Mirovek digere
Di paşila xwe de
Di nava tariyê de
Ger bibîne
Bêhna dev û lêvên wî dikişîne..
Nebîne
Wekî tesbîhek
Ax û waxan dikişîne..
Rondikên Binevşê ez im
Bi hemû zilimkariya xwe ve
Ez:tênêtiya wê
Ez:hesreta wê
Ez:êşên wê
Ez:hêviyên wê
Ez:evîna wê
Ez:dil û canê wê
Ez:jiyîn û mirina wê
Ez ji herkesî xedart ir ez
Ez ji herkesî xerabtir ez
Ez ji herkesî bêxêr ez..
Rondikên Binevşê ez im..
EZ..
Helbest:Occo MAHABAD

occo mahabad-bajarek

Helbest:Occo Mahabad

Bajarek

Bajarek…

Bajarek bifikire ku
di nav de ez
bêkes û tenê.
Te difikirim
te digerim
te dixwazim
hesreta te dikişînim.
Bajarek bifikire ku
bê te bi hertiştên xwe min dixeniqîne
tehma jiyana min jehr kiriye.
Bajarek bifikire ku
bûye hepsa min
ez bûme mehkûmê wî
dest û lingên min girê daye
min dixapîne.
Bajarek
ez û tu
eşq û tenêtî
hesret û gazin…
Çi bibêjim
tenêtî ji her alî ve min dikuje
Bizanibe ku ez dimirim
saet bi saet
roj bi roj ez dimirim
tu tune yî
ez dimirim…..
Helbest:Occo Mahabad

Occo Mahabad-wîjdan

1466381805962

Wîjdan…
Ji bo ku te ji bîr bikim
Min xwe diavêt nivîna her jinê
Şev xayîn bû
Şev dikeniya
Şev tolaz bû.
Dengê girînên te
Dijmin dijmin
Dilop bi dilop
Diket li ser dilê min ê rezîl
Dil tarî bû
Diqîriya
Jan dida.
Wîjdan di nava şevên bênamûs de
Dibû kujerekî bêbext
Min hinekî tu dikuştî
Hinekî xwe
Hinekî jinên şevê
Şev serxweş
Ez kew
Her jin nêçîrvan bû.

Ji bo ku te ji bîr bikim
Min lêvên her jinê dimijand
Şev şerm dikir
Lêv şerm nedikir
Lêv qerisî
Lêv qermiçî bû
Lêv bi derewan maç dikir.
Di nava şevên bênamûs de
Her deng dibû dengê te
Her jin dibû bedena te

Ne awirên te yên qehbikî hebûn
Ne destên te yên biçûk
Ne jî germahiyên te.
Ji bo ku te ji bîr bikim
Dibûm riswa
Dibûm qeşmer
Dibûm bahoz

Min çi dikir te ji bîr nedikir
Dicemidim
Ka hembêza te
Ka kenên te…

Helbest:Occo Mahabad

Occo Mahabad-bêrî

15317996_1361551587189368_364440368994084249_n.jpg

Bêrî…
Herkes tiştekî hez dikir
Min kêleka çavên te hez dikir
Di nava tenêtî û qerebalixan de
Hesreta te hebû
Tenêtî dibû tu
Qerebalix dibû tu…
Herkes bêriya tiştekî dikir
Min bêriya kenên te dikir…
Ez diçûm
Kenên te jî
Bi min re dihatin…
Her der dibû kenên te
Herkes bi kenên te dikeniya
Şa dibû
Ne derd dima ne jî keder…

Herkes tiştekî dixwest
Min destên te yên biçûk dixwest
Destên te
Rûyê min
Dilê min
Bedena min germ dikir
Di destên te de
Tîna tenêtiya min dihat şikandin
Di destên te de
Min derdên xwe ji bîr dikir
Di destên te de
Ji nû ve dihatim afirandin…

Helbest:Occo MAHABAD

Occo Mahabad-Li ser çarîna Bav Tahirê Uryan (Hemedanî)

15400_840321045979094_1652524040526757511_n.jpg

Li ser çarîna Bav Tahirê Uryan (Hemedanî)…
Ey dîlberê
Gerdenloqumê
De bêje
Devê te şekir be
Şerbet çi ye?
Lêvê te mey be
Meyxane çi ye?
Dêma te sorgulî be
Gulistan çi ye?
Zimanê te cenet be
Cehenem çi ye?

Bejna te heyv be
Dinya çi ye?
Evîna te dil be
Dilrevîn çi ye?
Derdê min tu bî
Derman çi ye?
War û malê te ez bim
Çima disekinî?

Helbest:Occo Mahabad

%d blogcu bunu beğendi: